नयाँ संसद्को पहिलो औपचारिक पाइलाका रूपमा रहेको शपथ ग्रहण समारोहमा आज सिट व्यवस्थापनको दृश्यले धेरैको ध्यान तानेको छ। संसद् भवनमा देखिएको यो नयाँ मर्यादाक्रमले परम्परागत राजनीतिको साटो नयाँ र वैकल्पिक शक्तिको बढ्दो प्रभावलाई स्पष्ट रूपमा संकेत गरेको छ। समारोहको सबैभन्दा महत्वपूर्ण मानिने अघिल्लो लहरमा यसपटक पुराना हस्तीहरूको साटो नयाँ अनुहारहरूको बाहुल्यता देखियो।
राष्ट्रिय स्वतन्त्र पार्टी (रास्वपा) की नेतृ सोभिता गौतम, सभापति रवि लामिछाने, र वरिष्ठ नेता बालेन्द्र साह (बालेन) अग्रपंक्तिमा देखिँदा संसद्को वातावरण नै बदलिएको महसुस गरिएको थियो। सोही लहरमा अर्थशास्त्री डा. स्वर्णिम वाग्ले, राप्रपाका ज्ञानेन्द्र शाही र धरानका मेयर हर्क साम्पाङले पनि स्थान पाएका थिए। रोचक कुरा त के छ भने, दशकौंदेखि राजनीतिमा वर्चस्व जमाउँदै आएका पूर्वप्रधानमन्त्री पुष्पकमल दाहाल ‘प्रचण्ड’ र एमालेका रामबहादुर थापा ‘बादल’ जस्ता प्रभावशाली नेताहरू यसपटक नयाँ पुस्ताको पछाडि देखिनुभयो, जसलाई धेरैले राजनीतिक परिवर्तनको एउटा बलियो संकेतका रूपमा लिएका छन्।
यो सिट व्यवस्थापन केवल नयाँ र पुराना शक्तिबीचको भिन्नतामा मात्र सीमित रहेन। रास्वपाका प्रभावशाली मानिने मनिष झा, डा. तोसिमा कार्की र प्रखर वक्ता रमेश प्रसाईँले पहिलो लहरमा स्थान नपाएर दोस्रो दीर्घामा बस्नुपर्दा पार्टीभित्रकै आन्तरिक व्यवस्थापनमाथि पनि प्रश्न उब्जाएको छ। त्यसैगरी सामाजिक सञ्जालका चर्चित अभियन्ता सुदन गुरुङ र आशिका तामाङ पछिल्लो लहरमा सीमित हुनुभएको थियो।
संसद्को यो प्रारम्भिक तस्बिरले आगामी दिनमा सदनभित्र हुने बहसको प्रकृति र शक्ति सन्तुलन फेरिने स्पष्ट पारेको छ। सडक र स्थानीय तहबाट उदाएका पात्रहरूले अग्रस्थान ओगट्नुले अबको संसदीय प्रक्रियामा पुरानो ढर्राको साटो नयाँ र आक्रामक हस्तक्षेप हुने सम्भावनालाई बल पुर्याएको छ।
