पोखरा महानगरपालिकाले पछिल्लो समय देखिएको फोहोर व्यवस्थापन समस्यालाई समाधानतर्फ उन्मुख बनाउँदै तत्काल र दीर्घकालीन उपायहरू अघि बढाएको जनाएको छ।
मेयर धनराज आचार्यका अनुसार नयाँ अस्थायी विसर्जन केन्द्र सञ्चालनमा आएपछि फोहोर संकलन पुनः नियमित हुँदै गएको छ। आन्दोलनसँग सम्बन्धित अवशेष तथा अतिरिक्त फोहोरका कारण पुरानो केन्द्र अपेक्षाभन्दा चाँडै भरिएपछि समस्या चर्किएको थियो।
उहाँले विरोधका क्रममा जलेका सामग्री र संरचनाबाट थपिएको फोहोरले व्यवस्थापनमा दबाब बढाएको स्पष्ट पार्नुभयो। यसले शहरमा फोहोर संकलनमा अवरोध ल्याएको थियो।
दीर्घकालीन समाधानका लागि महानगरले ‘फोहोरबाट मोहोर’ अवधारणाअन्तर्गत काम अघि बढाएको छ। दैनिक करिब २२५ टन फोहोर उत्पादन हुने पोखरामा यसबाट ७ दशमलव ५ मेगावाट बराबर ऊर्जा उत्पादन गर्न सकिने अनुमान गरिएको छ।
युरोपेली प्रविधिमा आधारित प्रशोधन केन्द्रमार्फत ग्यास, कम्पोस्ट मल र निर्माण सामग्री उत्पादन गर्ने योजना रहेको छ। यसका लागि गैरआवासीय नेपालीहरूको टोलीलाई ठेक्का प्रदान गरिएको छ।
छदेखि आठ महिनाभित्र उपकरण जडान गरी एक वर्षभित्र केन्द्र सञ्चालनमा ल्याउने लक्ष्य राखिएको छ, जसले नमूना परियोजनाका रूपमा काम गर्ने अपेक्षा गरिएको छ।
अन्तर्राष्ट्रिय विमानस्थल सञ्चालनपछि उडान सुरक्षालाई ध्यानमा राख्दै पुरानो ल्याण्डफिल साइट बन्द गर्नुपरेको थियो, जसले नयाँ व्यवस्थापन प्रणाली आवश्यक बनाएको हो।
मेयर आचार्यले फोहोर व्यवस्थापनमा राजनीति नगर्न आग्रह गर्दै शहर सफा राख्ने जिम्मेवारी सबैको साझा भएको उल्लेख गर्नुभयो।
