काभ्रेपलाञ्चोक । प्रधानमन्त्री बालेन्द्र (बालेन) शाहको कार्यशैलीप्रति असन्तुष्टि बढ्दै जाँदा सत्ता साझेदार राष्ट्रिय स्वतन्त्र पार्टी (रास्वपा) भित्र ठूलो राजनीतिक उथलपुथलको संकेत देखिएको छ। २०८३ साल साउन २ र ३ गते काभ्रेपलाञ्चोकको धुलिखेलस्थित दुसित थानी हिमालयन रिसोर्टमा रास्वपा सभापति रवि लामिछाने र उपसभापति तथा अर्थमन्त्री डा. स्वर्णिम वाग्लेबीच भएको २४ घण्टे लामो भेटवार्ताले प्रधानमन्त्रीविरुद्ध रणनीतिक घेराबन्दी सुरु भएको स्पष्ट पारेको छ। पारिवारिक जमघटको आवरणमा भएको भनिएको उक्त भेटघाट वास्तवमा सरकारको नेतृत्व परिवर्तन र आन्तरिक संकटको गम्भीर बहसमा केन्द्रित रहेको रहस्य बाहिरिएको छ।
एक उच्च स्रोतका अनुसार, धुलिखेलको सो सघन संवादका क्रममा अर्थमन्त्री डा. वाग्लेले सभापति लामिछानेसमक्ष प्रधानमन्त्री बालेन शाहको विकल्प खोज्नुपर्ने अत्यन्तै गम्भीर र ठोस प्रस्ताव राखेका छन्। डा. वाग्लेले कि त रवि लामिछाने स्वयम्ले प्रधानमन्त्रीको दाबी गर्दै अघि बढ्नुपर्ने, यदि त्यसो गर्न नचाहेमा वाग्ले आफैंलाई प्रधानमन्त्रीको रूपमा अघि सार्न लामिछानेले पूर्ण समर्थन गर्नुपर्ने सर्त अघि सारेको स्रोतको दाबी छ। स्रोतका अनुसार यी दुवै शीर्ष नेता प्रधानमन्त्री शाहको पछिल्लो रवैया र कार्यशैलीबाट अत्यन्तै रुष्ट बनेका छन्। बालेनको वर्तमान कार्यशैली र जिद्दीपनाले अहिलेसम्म सरकारले हासिल गरेका उपलब्धिहरू गुम्ने र अन्त्यमा रास्वपा नै चरम अस्थिरता र दुर्घटनामा पर्ने गम्भीर चिन्ता डा. वाग्लेले भेटका क्रममा व्यक्त गरेको स्रोतले जनाएको छ।
यो धुलिखेल बैठक प्रधानमन्त्री शाह र अर्थमन्त्री वाग्लेबीच चुलिँदै गएको अविश्वासको पृष्ठभूमिमा भएको हो। पछिल्लो समय प्रधानमन्त्री बालेनले अर्थमन्त्रीका आर्थिक नीतिहरूप्रति खुल्लमखुल्ला असन्तुष्टि व्यक्त गर्दै आएका छन्। विशेषगरी पुँजी निर्माणमा भन्दा विदेशी ऋणमा बढी जोड दिएको र राष्ट्रिय अर्थतन्त्रमा उत्साह ल्याउन नसकेको भन्दै प्रधानमन्त्रीले वाग्लेको आलोचना गरेका थिए। साथै, धितोपत्र बोर्डको अध्यक्षमा वाग्लेका निकटस्थ मानिने गोपालप्रसाद भट्टलाई नियुक्त गरिएपछि प्रधानमन्त्री पक्षले यसलाई 'स्वार्थको बाझिएको' भन्दै कडा विरोध गरेको थियो। यसैको परिणामस्वरुप प्रधानमन्त्रीले अर्थमन्त्रीलाई नै बाइपास गरेर नेपाल राष्ट्र बैंकका गभर्नर तथा निजी क्षेत्रका प्रतिनिधिहरूसँग समानान्तर आर्थिक परामर्श गर्न थालेपछि विवाद उत्कर्षमा पुगेको हो।
यसबाहेक रास्वपाभित्र मन्त्रिपरिषद् पुनर्गठनको चर्चा, पार्टी विधान संशोधनका विषय र न्यायालयका नियुक्तिहरूलाई लिएर आन्तरिक किचलो बढिरहेको छ। प्रधानमन्त्रीले अर्थमन्त्रीको कार्यसम्पादनमा प्रश्न उठाइरहँदा, उता सभापति लामिछानेले पनि बालेननिकट मन्त्रीहरूको कार्यक्षमतामाथि सूक्ष्म निगरानी गरिरहेका छन्। धुलिखेलमा भएको यो भेटलाई कतिपयले सामान्य विश्राम भने तापनि, राजनीतिक वृत्तमा यसलाई प्रधानमन्त्री शाहविरुद्धको मोर्चाबन्दी र सत्ता समीकरण परिवर्तनको पूर्वतयारीका रूपमा हेरिएको छ। रवि लामिछाने र स्वर्णिम वाग्लेबीचको यो नयाँ रणनीतिक समझदारीले निकट भविष्यमै नेपाली राजनीतिमा ठूलो हलचल ल्याउने निश्चितप्रायः देखिन्छ।
