जिल्ला प्रहरी कार्यालय पर्सा मातहतको वडा प्रहरी कार्यालय श्रीपुरको टोलीले अपहरण तथा कर्तव्य ज्यान मुद्दाका एक फरार अभियुक्तलाई पक्राउ गरेको छ। पक्राउ पर्नेमा भारतको बिहार, बेतिया थाना बगाहा घर भएका ३० वर्षीय विकास शर्मा रहेका छन्।
शर्मालाई अपहरण र हत्याको गम्भीर अपराधमा अदालतले २५ वर्षको कैद सजाय सुनाएको थियो। उनी काठमाडौँस्थित केन्द्रीय कारागार जगन्नाथदेवलमा कैद भुक्तान गरिरहेको अवस्थामा २०८२ साल भदौ २४ गते जेन्-जी (Zen-Z) आन्दोलनको क्रममा फरार भएका थिए।
विशेष सूचनाको आधारमा खटिएको प्रहरी टोलीले उनलाई २०८३ वैशाख १३ गते दिउँसो करिब ३:०० बजे वीरगञ्ज महानगरपालिका-२४, रामगढवास्थित लुकिछिपी बसिरहेको अवस्थामा फेला पारेको हो। प्रहरी नायब उपरीक्षक एवं सूचना अधिकारी हरि बहादुर बस्नेतका अनुसार शर्मालाई आवश्यक कानुनी प्रक्रिया पूरा गरी पुनः कारागार कार्यालय बुझाउने तयारी भइरहेको छ।
कैदी परिचयपत्र नम्बर ९९१३८०४ रहेका शर्माको पक्राउले विगतको अस्थिरताको फाइदा उठाई फरार रहेका अपराधीहरूलाई कानुनको कठघरामा ल्याउने प्रहरीको सक्रियतालाई थप बल पुर्याएको छ। यो सफल अप्रेसनले सीमावर्ती क्षेत्रमा लुकेर बसेका फरार प्रतिवादीहरूलाई पक्राउ गर्ने अभियानमा ठूलो सफलता मिलेको छ।
