जिल्ला प्रहरी कार्यालय पर्साले वीरगञ्ज महानगरपालिका क्षेत्रबाट ११ लाख रुपैयाँभन्दा बढी मूल्यको भन्सार छलीका लत्ताकपडा नियन्त्रणमा लिएको छ।
जिल्ला प्रहरी कार्यालय पर्साद्वारा आर्थिक वर्ष २०८३/०८४ मा जारी प्रेस विज्ञप्ति नं. ५१ अनुसार सूचना परिचालन तथा प्रहरी कारबाहीका क्रममा उक्त सामान बरामद गरिएको हो। प्रहरी टोलीले मिति २०८३ भाद्र २७ गते बेलुकी करिब १८:३० बजे वीरगञ्ज महानगरपालिका वडा नं. १६ स्थित ईनर्वागाउँबाट गैरकानुनी रूपमा ओसारपसार भइरहेको लत्ताकपडा नियन्त्रणमा लिएको थियो।
भन्सार महसुल छली गरी ओसारपसार भइरहेको अवस्थामा नियन्त्रणमा लिइएका ती विभिन्न किसिमका कपडाहरूको कुल बजार मूल्य रु. ११,०२,१४० (एघार लाख दुई हजार एक सय चालीस) रहेको प्रहरीले जनाएको छ।
बरामद गरिएका सम्पूर्ण लत्ताकपडाहरू आवश्यक कानुनी कारबाहीका लागि मिति २०८३/०५/२८ गते वीरगञ्ज भन्सार कार्यालय पर्सामा बुझाइएको छ। यस्ता कारबाहीले सीमा क्षेत्रमा हुने राजस्व छली र अवैध व्यापार नियन्त्रणमा सहयोग पुग्ने देखिन्छ।
