झापाको गौरादह नगरपालिकामा शैक्षिक पूर्वाधार विकासका लागि एक महत्वपूर्ण पहल सुरु भएको छ। कोशी प्रदेशका मुख्यमन्त्री हिक्मत कुमार कार्कीले गौरादह–१ स्थित श्री जनता माध्यमिक विद्यालयको नयाँ भवनको आज जग बसाल्नुभयो। सो समारोहमा काठमाडौंस्थित भारतीय राजदूतावासका काउन्सलर गीतांजलि ब्रैंडन र नगरपालिकाका मेयर छत्रपति सुबेदीको पनि उपस्थिति रहेको थियो।
करिब ५ करोड ८० लाख नेपाली रुपैयाँको लागतमा निर्माण हुन लागेको यो परियोजना भारत सरकारको अनुदान सहयोगमा अगाडि बढाइएको हो। 'उच्च प्रभाव सामुदायिक विकास परियोजना' अन्तर्गत निर्माण हुने यस भवनले स्थानीय विद्यार्थी र शिक्षकहरूका लागि सिकाईको आधुनिक र सुदृढ वातावरण तयार गर्ने लक्ष्य राखेको छ।
कार्यक्रमलाई सम्बोधन गर्दै मुख्यमन्त्री कार्कीले नेपालको विकास प्रक्रियामा भारतले पुर्याउँदै आएको निरन्तर सहयोगको प्रशंसा गर्नुभयो। गौरादह नगरपालिकाको शैक्षिक गुणस्तर सुधार्न यो नयाँ संरचनाले कोशेढुङ्गाको काम गर्ने विश्वास उहाँले व्यक्त गर्नुभयो।
यो परियोजनाको कार्यान्वयन सिधै गौरादह नगरपालिकामार्फत गरिनेछ। यसले स्थानीय तहको क्षमता विकाससँगै पूर्वाधार निर्माणमा दुई देशबीचको साझेदारीलाई अझ बलियो बनाएको छ।
छिमेकी मुलुकका रूपमा भारतले नेपालको प्राथमिकताका क्षेत्रहरूमा पूर्वाधार विकास गरी समृद्धि हासिल गर्ने सरकारको प्रयासलाई सहयोग गर्दै आएको छ। यो नयाँ विद्यालय भवनको निर्माण सम्पन्न भएपछि यस क्षेत्रका सयौं विद्यार्थीहरूले उन्नत शैक्षिक सुविधा प्राप्त गर्ने अपेक्षा गरिएको छ।
