राइड सेयरिङ प्लेटफर्ममा भइरहेको चरम श्रम शोषण र आफूखुसी भाडा निर्धारणको विरोध गर्दै चालकहरूले देशभर सेवा नै पूर्ण रूपमा बन्द गर्ने चेतावनी दिएका छन्। नियमनकारी निकायको उदासिनताले सीमान्तकृत कामदारहरू मारमा परेको निष्कर्ष निकाल्दै 'प्रो राइडर समूह' ले सरकार र कम्पनीविरुद्ध चरणबद्ध आन्दोलनको शंखघोष गरेको छ।
सरोकारवाला निकायहरूसँग पटक-पटक गरिएको संवादको प्रयास विफल भएपछि आक्रोशित चालकहरूले आइतबार काठमाडौँको बल्खुमा कालोपट्टी बाँधेर सांकेतिक विरोध प्रदर्शन गरेका हुन्। फितलो सरकारी नियमनका कारण आफूहरू निरन्तर ठगिनु परेको उनीहरूको गुनासो छ।
आन्दोलनरत समूहले आफ्नो श्रमको उचित मूल्याङ्कन हुनुपर्ने भन्दै मुख्य ५ बुँदे माग अघि सारेको छ। जसमा सम्पूर्ण राइड सेयरिङ एपहरूमा अनिवार्य रूपमा प्रतिकिलोमिटर २७ रुपैयाँ भाडादर कायम गरिनुपर्ने प्रमुख सर्त रहेको छ। साथै, 'गोल ट्रिप', बोनस वा अन्य आकर्षक योजनाको बाहानामा चालकको आम्दानी तलमाथि पार्ने काम तत्काल रोक्न उनीहरूले जोडदार माग गरेका छन्।
यसबाहेक, दर्ता बिना नै गैरकानुनी रूपमा चलिरहेका कम्पनीहरूलाई तत्काल प्रतिबन्ध लगाउनुपर्ने र विदेशी एपमार्फत दैनिक बाहिरिरहेको ठूलो धनराशि रोक्न सरकारले कडा कदम चाल्नुपर्ने समूहको भनाइ छ। विदेशी एपले कानुन नमाने सरकार आफैँले स्वदेशी एप सञ्चालन गर्नुपर्ने र नेपाली नवप्रवर्तनलाई प्रोत्साहन गर्नुपर्ने उनीहरूको माग छ।
आफ्ना मागहरूको सुनुवाइ नभएमा बृहत् हस्ताक्षर सङ्कलन, विशाल र्याली तथा रिले अनसन हुँदै अन्त्यमा राइड सेयरिङ सेवा नै पूर्ण रूपमा ठप्प पार्ने उनीहरूको तयारीले आगामी दिनमा सहरी यातायात व्यवस्थापन निकै चुनौतीपूर्ण बन्ने देखिन्छ।
