काठमाडौंको त्रिपुरेश्वरस्थित राहदानी विभाग अगाडि पार्किङ गरिएको मोटरसाइकलमा नगर प्रहरीले ह्विल लक लगाएपछि विवाद हुँदा एक युवकले आत्मदाहको प्रयास गरेका छन्। राइड शेयरिङका क्रममा रहेका २५ वर्षीय गणेश नेपालीले बिहीबार दिउँसो आफ्नै शरीरमा आगो लगाएर आत्मदाहको प्रयास गरेका हुन्।
जिल्ला प्रहरी परिसर काठमाडौंका सूचना अधिकारी एवं प्रहरी उपरीक्षक (एसपी) पवनकुमार भट्टराईका अनुसार मुगुको सोरु गाउँपालिका वडा नं १ का स्थायी बासिन्दा नेपाली हाल भक्तपुरमा बस्दै आएका थिए। उनले राइड शेयरिङ गरेर राहदानी विभागको ३ नम्बर गेट नजिकै आफ्नो मोटरसाइकल रोकेका थिए।
निषेधित क्षेत्रमा पार्किङ गरेको भन्दै नगर प्रहरीले ह्विल लक लगाएपछि उनीहरूबिच विवाद भएको प्रत्यक्षदर्शीलाई उद्धृत गर्दै एसपी भट्टराईले जानकारी दिए। नगर प्रहरीसँगको विवादपछि आक्रोशित बनेका नेपालीले मोटरसाइकलबाट पेट्रोल निकालेर दिउँसो करिब १:४५ बजे आफ्नै शरीरमा छर्किएर आगो लगाएका थिए।
घटनास्थलमा खटिएको प्रहरी टोलीले तत्काल आगो निभाएर उनलाई उद्धार गरी उपचारका लागि वीर अस्पताल पुर्याएको थियो। प्रहरीका अनुसार आगोले जलेर गम्भीर घाइते भएका नेपालीको अवस्था चिन्ताजनक रहेको र हाल अस्पतालमा उपचार भइरहेको छ।
यस घटनाले नगरको पार्किङ व्यवस्थापन र सर्वसाधारणबिचको बढ्दो टकरावलाई उजागर गरेको छ भने घाइतेको स्वास्थ्य अवस्था र घटनाको थप विवरणका सम्बन्धमा सम्बन्धित निकायको कदमलाई प्रतिक्षा गरिएको छ।
