एआई–सञ्चालित क्रिएटर मार्केटिङ प्लेटफर्म भीलले नेपाल र भारतमा आफ्नो औपचारिक सेवा शुभारम्भ गरेको घोषणा गरेको छ। काठमाडौँमा जुलाई १६, २०२६ मा आयोजित एक कार्यक्रमका बीच कम्पनीले दक्षिण एसियाली बजारमा आफ्नो उपस्थिति विस्तार गर्दै व्यवसाय तथा कन्टेन्ट क्रिएटरहरूलाई एउटै डिजिटल प्रणालीमार्फत जोड्ने नयाँ पहल सुरु गरेको हो। यस एकीकृत प्लेटफर्ममार्फत व्यवसायहरूले उपयुक्त क्रिएटर खोज्न, क्याम्पेन सञ्चालन गर्न, भिडियो सम्पादन तथा स्वीकृति दिन, भुक्तानी व्यवस्थापन गर्न र कन्टेन्टको प्रतिलिपि अधिकार सुरक्षित गर्न सक्नेछन्।
कार्यक्रमलाई सम्बोधन गर्दै भीलका संस्थापक तथा प्रमुख कार्यकारी अधिकृत दिलीप ढकालले नेपाल र भारतमा सेवा सुरु गर्नु दक्षिण एसियाको क्रिएटर अर्थतन्त्रको भविष्य निर्माण गर्ने दीर्घकालीन प्रतिबद्धता भएको बताउनुभयो। ढकालका अनुसार यस क्षेत्रमा रहेका लाखौँ प्रतिभाशाली क्रिएटर र व्यवसायहरूलाई विश्वस्तरीय प्रविधिमार्फत सहकार्य गर्ने, सँगै विकास गर्ने र विश्व बजारमा प्रतिस्पर्धा गर्ने अवसर प्रदान गर्न भीलले ठोस पूर्वाधार निर्माण गरिरहेको छ। यसले क्रिएटरहरूलाई दिगो करियर निर्माण गर्न र व्यवसायहरूलाई प्रामाणिक कन्टेन्टमार्फत नयाँ उचाइमा पुर्याउन सहयोग पुग्ने उहाँले उल्लेख गर्नुभयो।
शुभारम्भ कार्यक्रममा नेपालका लागि अमेरिकी नियोगका कार्यवाहक प्रमुख स्कट उर्बोम र ग्लोबल इक्विटी फन्डका प्रबन्ध निर्देशक डा. मनीष थापा सम्माननीय प्रमुख अतिथिका रूपमा सहभागी हुनुभएको थियो। सो अवसरमा कार्यवाहक प्रमुख उर्बोमले अमेरिकी उद्यमशीलता र नेपाली प्रतिभालाई एकै ठाउँमा जोड्दै नयाँ अवसर सिर्जना गर्ने, व्यावसायिक सम्बन्धलाई सुदृढ बनाउने र साझा समृद्धिलाई अघि बढाउने दिशामा भील एक उत्कृष्ट उदाहरण भएको विचार व्यक्त गर्नुभयो। नेपाली–अमेरिकी उद्यमी दिलीप ढकालद्वारा स्थापित यस प्लेटफर्मले परम्परागत रूपमा प्रयोग हुने इमेल, स्प्रेडसिट र छुट्टाछुट्टै भुक्तानी प्रणालीको झन्झटलाई विस्थापित गरेको छ।
प्लेटफर्मको कार्यप्रणाली अनुसार व्यवसायहरूले आफ्ना उत्पादन र लक्षित ग्राहकका आधारमा अभियानको विवरण तयार पार्छन् र क्रिएटरहरूले त्यसमा आवेदन दिन्छन् वा एआई सिफारिस प्रणालीमार्फत छनोट हुन्छन्। छनोट भएका क्रिएटरहरूले प्लेटफर्ममै उपलब्ध भिडियो सम्पादन उपकरण र लाइसेन्स प्राप्त सङ्गीत प्रयोग गरी कन्टेन्ट तयार पार्छन् भने ब्रान्डले त्यसको समीक्षा र स्वीकृति जनाएपछि भील वालेटमार्फत स्वचालित रूपमा भुक्तानी सम्पन्न हुन्छ। हाल भीलसँग विश्वभरका ४५० भन्दा बढी ब्रान्ड, ५ लाख ५० हजारभन्दा बढी प्रमाणित क्रिएटर र १२१ भन्दा बढी देशहरू जोडिएका छन्।
नेपालमा सहज भुक्तानी प्रक्रियाका लागि भीलले एनसीएचएल, फोनपे, ईसेवा, खल्ती र हाम्रो पेसँग रणनीतिक साझेदारी गरेको छ। नेपालका व्यवसायहरूका लागि एनसीएचएलमार्फत, क्रिएटरहरूका लागि हाम्रो पेमार्फत र दुवैका लागि फोनपे, ईसेवा र खल्तीमार्फत स्थानीय भुक्तानी सुविधा उपलब्ध गराइएको छ। यो डिजिटल वित्तीय साझेदारीले नेपालको क्रिएटर अर्थतन्त्रलाई व्यवस्थित बनाउँदै प्रविधि क्षेत्रमा नयाँ आयाम थप्ने विश्वास गरिएको छ।
