लामो समयको प्रतीक्षापछि एप्पलले आफ्नो पहिलो फोल्डिङ स्मार्टफोन, जसलाई 'आइफोन अल्ट्रा' समेत भनिएको छ, सन् २०२६ को अन्त्यसम्ममा बजारमा ल्याउने तयारी गरेको छ। उद्योगका भित्री स्रोतहरूका अनुसार यस उपकरणको उत्पादन प्रक्रिया आइफोन १८ सिरिजसँग मेल खाने गरी अघि बढाइएको छ।
यो नयाँ आइफोनमा ७.८ इन्चको आन्तरिक फोल्डिङ स्क्रिन र ५.३ इन्चको बाहिरी स्क्रिन रहने अनुमान गरिएको छ। एप्पलले स्क्रिनको सुरक्षाका लागि विशेष प्रकारको 'फ्लेक्सिबल कुसन' टाँस्ने प्रविधि प्रयोग गर्नेछ, जसले झट्का सोस्न र स्क्रिनलाई सुरक्षित राख्न मद्दत गर्नेछ।
उपकरणको बनावटमा 'लिक्विडमेटल' को प्रयोग गरिनेछ, जुन टाइटेनियम भन्दा साढे दुई गुणा बढी बलियो मानिन्छ। यस प्रविधिले गर्दा फोन खोल्दा देखिने स्क्रिनको खुम्च्याइ (क्रिज) निकै कम हुने दाबी गरिएको छ। सुरक्षाका लागि यसमा 'अण्डर-डिस्प्ले' टच आइडी रहने सम्भावना छ।
प्राविधिक रूपमा यसमा ए२० चिप र १२ जीबी र्याम रहने बताइएको छ। एप्पलको यो सबैभन्दा महँगो फोन हुनेछ, जसको सुरुवाती मूल्य करिब २ हजार डलर (करिब २ लाख ६५ हजार नेपाली रुपैयाँ) भन्दा बढी हुन सक्ने प्रक्षेपण गरिएको छ।
