गत जुलाई १९ मा न्युजर्सीस्थित मेटलाइफ स्टेडियममा भएको २०२६ फिफा विश्वकपको फाइनल खेल पुनः गराउन माग गर्दै फिफामाथि दबाब बढाउन एउटा अनलाइन अभियान तीव्र रूपमा अघि बढेको छ। उक्त फाइनल भिडन्तमा अतिरिक्त समयमा फेरान टोरेसले गरेको निर्णायक गोलको मद्दतले स्पेनले साविक विजेता अर्जेन्टिनालाई १-० ले पराजित गर्दै उपाधि कब्जा गरेको थियो।
यस विवादको केन्द्रमा अर्जेन्टिनि समर्थक गिसेला सान्चेजद्वारा 'चेञ्ज डट अर्ग' मा सुरु गरिएको अनलाइन निवेदन रहेको छ, जसमा हालसम्म ८० हजारभन्दा बढी मानिसहरूले हस्ताक्षर गरिसकेका छन्। समर्थकहरूले स्लोभानियाली रेफ्री स्लाभको भिन्चिचका केही विवादित निर्णयहरूले खेलको परिणाममा प्रत्यक्ष असर पारेको आरोप लगाएका छन्। विशेषगरी खेलको महत्त्वपूर्ण मोडमा अर्जेन्टिनाका खेलाडी एन्जो फर्नान्डेजलाई दोस्रो पहेँलो कार्ड देखाउँदै मैदानबाहिर पठाउने निर्णयले टोलीलाई १० खेलाडीमा सीमित बनाएको विषयलाई समर्थकहरूले मुख्य प्रमाणका रूपमा प्रस्तुत गरेका छन्।
निवेदनमा सान्चेजले फाइनल खेल रेफ्रीको विवादित व्यवहारबाट प्रभावित भएको दाबी गर्दै अन्तर्राष्ट्रिय फुटबलको पारदर्शिता र निष्पक्षताका लागि फिफाले यस विषयमा गम्भीर छानबिन गर्नुपर्ने उल्लेख गरेकी छन्। यद्यपि, उक्त निवेदनमा रेफ्रीको बदमासी पुष्टि गर्ने कुनै पनि स्वतन्त्र प्रमाण समावेश नगरिएको प्रतिवेदनहरूले जनाएका छन्।
सामाजिक सञ्जाल र अन्तर्राष्ट्रिय सञ्चारमाध्यममा यो अभियानले व्यापक चर्चा पाए तापनि खेल विशेषज्ञहरूले फाइनल खेल पुनः हुने सम्भावना लगभग शून्य रहेको बताएका छन्। फिफाको नियम अनुसार 'चेञ्ज डट अर्ग' जस्ता प्लेटफर्मका निवेदनहरूको कुनै कानुनी वा नियमनकारी अधिकार हुँदैन, र रेफ्रीको निर्णयप्रति समर्थकहरू असन्तुष्ट भएकै आधारमा नतिजा उल्ट्याउने व्यवस्था फिफाको नियमावलीमा छैन।
यसैबीच, अर्जेन्टिनाका मुख्य प्रशिक्षक लियोनेल स्कालोनीले रेफ्रीको निर्णयका कारण टोलीले उपाधि गुमाउनुपरेको भन्ने दाबीलाई अस्वीकार गरेका छन्। प्रतिवेदनहरूका अनुसार स्कालोनीले हारको निराशाका बाबजुद स्पेन जितको हकदार रहेको स्पष्ट पारेका छन्, जसले समर्थकहरूको पुनरावलोकन अभियानको मुख्य तर्कलाई कमजोर बनाएको छ। यसअघि सेमिफाइनलमा स्पेनसँग पराजित भएपछि फ्रान्सेली समर्थकहरूले पनि यस्तै निवेदन दर्ता गराएका थिए, जसको आधिकारिक नतिजामा कुनै प्रभाव परेको थिएन। हाल स्पेन नै २०२६ फिफा विश्वकपको आधिकारिक विजेता रहेको छ र फिफाले पुनः खेल गराउने कुनै संकेत दिएको छैन।
