अमेरिकी विदेश मन्त्रालयले ३० अगस्ट २०२६ मा एक ट्राभल एडभाइजरी जारी गर्दै आफ्ना नागरिकहरूलाई नेपाल भ्रमण गर्दा विशेष सतर्कता अपनाउन आग्रह गरेको छ। देशव्यापी रूपमा 'लेभल दुई' को चेतावनी जारी गर्दै मन्त्रालयले सम्भावित अशान्ति र प्राकृतिक जोखिमप्रति ध्यानाकर्षण गराएको छ।
सन् २०२५ सेप्टेम्बरदेखि सुरु भएको देशव्यापी विरोध प्रदर्शनहरू हाल रोकिएका र सुरक्षा स्थिति स्थिर रहे तापनि सहरी क्षेत्रमा अचानक प्रदर्शन हुन सक्ने जनाइएको छ। बिना पूर्वसूचना सुरु हुने यस्ता प्रदर्शनहरू हिंस्रक बन्न सक्ने भएकाले ठूला भिडभाडबाट टाढा रहन र स्थानीय प्रशासनका निर्देशन पालना गर्न आग्रह गरिएको छ।
यसैबीच, रसुवा जिल्लाको रसुवागढी-तिमुरे-स्याफ्रुबेँसी क्षेत्र तथा नेपाल-चीन सीमा नाकामा 'लेभल चार' अर्थात् 'भ्रमण नगर्नुहोस्' भन्ने कडा चेतावनी जारी गरिएको छ। बाढीका कारण पुगेको क्षति, यातायात तथा सञ्चार अवरोध र पहिरोको जोखिमका कारण सो क्षेत्रमा यात्रा नगर्न भनिएको हो।
साथै, स्वास्थ्य सेवाको सीमित क्षमता, काठमाडौँका अस्पतालहरूमा हुन सक्ने भिडभाड र प्राकृतिक विपद्को जोखिमलाई ध्यानमा राख्दै मन्त्रालयले आफ्ना नागरिकलाई स्वास्थ्य बिमा र आवश्यक औषधि साथमै राख्न सुझाव दिएको छ।
नेपालमा रहेका वा भ्रमणको योजना बनाइरहेका विदेशी नागरिकहरूलाई परिस्थिति अनुसार सतर्क रहन र सम्बन्धित निकायको निर्देशन पालना गर्न आह्वान गरिएको छ।
