काठमाडौंको त्रिभुवन अन्तर्राष्ट्रिय विमानस्थलबाट अवैध रूपमा बाह्य मुलुकतर्फ लैजान लागिएको ठूलो परिमाणको स्वदेशी तथा विदेशी मुद्रासहित दुई जना बंगलादेशी नागरिक पक्राउ परेका छन्। मलेसिया जाने तयारीमा रहेका ती यात्रुहरूलाई विमानस्थलको अन्तर्राष्ट्रिय प्रस्थान क्षेत्रमा खटिएका सुरक्षाकर्मीले नियन्त्रणमा लिएका हुन्।
विमानस्थल सुरक्षा कार्यालयका अनुसार पक्राउ पर्नेहरूमा ३९ वर्षीय मोहम्मद इन्ताज अली र ५० वर्षीय एमडी जाकिर हुसेन रहेका छन्। निजहरू बाटिक एयरको उडान नम्बर ओडी१८३ मार्फत काठमाडौंबाट क्वालालम्पुरतर्फ प्रस्थान गर्न लागेका थिए।
नियमित ब्यागेज स्क्रिनिङ र शारीरिक जाँचका क्रममा उनीहरूले बोकेको सुटकेसभित्र फल्स बटम बनाएर मुद्रा लुकाएको फेला परेको थियो। प्रहरीले उनीहरूको साथबाट नेपाली रुपैयाँ २२ लाख ५९ हजार, अमेरिकी डलर १ हजार र मलेसियन रिंगिट २० हजार गरी कुल ३१ लाख ५१ हजार रुपैयाँ बराबरको मुद्रा बरामद गरेको छ।
अध्यागमन प्रणालीको अभिलेख अनुसार यी दुवै नागरिकले यसअघि पनि पटक-पटक नेपाल आवतजावत गरेको देखिएको छ। मोहम्मद इन्ताज अली ३८ पटक र एमडी जाकिर हुसेन ११ पटक नेपाल आएको आधिकारिक तथ्याङ्कले देखाउँछ।
पक्राउ परेका व्यक्तिहरू र बरामद गरिएको सम्पूर्ण रकमलाई आवश्यक कानुनी कारबाही र थप अनुसन्धानका लागि ललितपुरको पुल्चोकस्थित राजस्व अनुसन्धान विभागमा पठाइएको छ। यस घटनामा अन्य समूहको संलग्नताबारे नेपाल प्रहरीले अनुसन्धानलाई अझ तीव्र बनाएको छ।
