अन्तर्राष्ट्रिय फुटबलको सबैभन्दा ठूलो महोत्सव फिफा विश्वकपको २३औं संस्करण आजदेखि औपचारिक रूपमा सुरु हुँदैछ। इतिहासमै पहिलोपटक तीन राष्ट्रहरू अमेरिका, मेक्सिको र क्यानडाले संयुक्त रूपमा यो प्रतियोगिता आयोजना गरिरहेका छन्, जहाँ पहिलोपटक ४८ वटा देशहरूले उपाधिका लागि प्रतिस्पर्धा गर्नेछन्। फाइनलसहित कुल १०४ खेलहरू सञ्चालन हुने यो प्रतियोगिता फुटबल इतिहासकै सबैभन्दा व्यापक आकारको हुनेछ।
नेपाली समयअनुसार शुक्रबार बिहान सुरु हुने यस महाकुम्भको स्वागतका लागि तीनवटै आयोजक देशमा विशेष उद्घाटन समारोहको तयारी गरिएको छ। पहिलो कार्यक्रम मेक्सिको सिटी स्टेडियममा हुनेछ भने त्यसपछि क्यानडाको टोरन्टो र अमेरिकाको लस एन्जलसमा भव्य उत्सव मनाइनेछ। ९० मिनेट चल्ने यस उद्घाटन समारोहमा विश्व प्रसिद्ध कलाकारहरू क्याटी पेरी, फुचुरे, अनित्ता, लिसा, रेमा र टाइलाले आफ्नो साङ्गीतिक प्रस्तुति दिएर विश्वकपको भव्यता प्रदर्शन गर्नेछन्।
उद्घाटन खेलमा आयोजक मेक्सिकोले घरेलु मैदानमा दक्षिण अफ्रिकाको सामना गर्दै खेलको सुरुवात गर्नेछ। यसपटकको प्रतियोगितामा सहभागी राष्ट्रहरूका लागि पुरस्कार राशिमा ठूलो वृद्धि गरिएको छ। फिफाले कुल ६५ करोड ५० लाख अमेरिकी डलरको पुरस्कार कोष सुरक्षित गरेको छ, जसमध्ये प्रतियोगिता जित्ने विजेता टोलीले मात्र ५ करोड अमेरिकी डलर प्राप्त गर्नेछ।
प्रतिस्पर्धाको इतिहासमा ब्राजिलले लगातार २३औं पटक विश्वकपमा सहभागिता जनाएर आफ्नो कीर्तिमानलाई निरन्तरता दिएको छ। अहिलेसम्म सर्वाधिक ५ पटक उपाधि जितेको ब्राजिलसँगै वर्तमान विजेता अर्जेन्टिना, फ्रान्स, पोर्चुगल, स्पेन र नेदरल्यान्ड्सलाई यस वर्षको मुख्य दाबेदारका रूपमा हेरिएको छ। ऐतिहासिक तथ्याङ्क अनुसार युरोपेली शक्तिहरू इटाली र जर्मनीले समान ४-४ पटक र अर्जेन्टिनाले ३ पटक यो प्रतिष्ठित ट्रफी आफ्नो नाम गरिसकेका छन्।
