नेपालमा गएको विनाशकारी बाढीपछिको खोज, उद्धार र राहत कार्यलाई सघाउन भारतले सेप्टेम्बर ९, २०२६ मा आठौँ भारतीय वायुसेनाको विमानमार्फत काठमाडौँमा मानवीय सहायता सामग्री पठाएको छ। गत अगस्ट २६, २०२६ देखि सुरु भएको यस द्रुत राहत अभियानअन्तर्गत भारतले आठ वटा विशेष उडानमार्फत १३० टनभन्दा बढी राहत सामग्री र ५४ जना विशेषज्ञ टोली नेपाल पठाइसकेको छ।
भारतले पठाएको राहत सामग्रीमा अस्थायी आश्रय, कम्बल, हाइजीन किट, सोलार बत्ती र औषधि लगायतका आधारभूत सामग्रीका साथै विशेष उद्धार उपकरणहरू रहेका छन्। यी उपकरणहरूमा सुरुङ तथा हिलोमा प्रयोग हुने उद्धार पोशाक, ग्यास डिटेक्टर्स, श्वासप्रश्वास यन्त्र, इन्फ्लेटेबल वाकवे, डिवाटरिङ पम्प र जेनरेटरहरू समावेश छन्।
भारतीय विशेष सुरुङ उद्धार टोलीले नेपाली सेनासँगको सहकार्यमा चिलिमे र लाङटाङका दुई प्रमुख स्थलहरूमा खोज कार्य सुरु गरेको थियो। हाल खोज तथा उद्धार कार्य मुख्यतया चिलिमे क्षेत्रमा केन्द्रित छ, जहाँ कठिन भौगोलिक बनावट, सीमित पहुँच र सुरुङको भिरालोपनका कारण जटिल चुनौती उत्पन्न भएको छ।
चिलिमे सुरुङसम्म एक्साभेटर जस्ता भारी मेसिनरी पुर्याउनका लागि अस्थायी मार्ग निर्माण भइरहेको छ, जुन आगामी दुई देखि तीन दिनभित्र सम्पन्न हुने अपेक्षा गरिएको छ। यसका साथै भारतीय फरेन्सिक टोलीले काठमाडौँका दुई प्रयोगशालामा डिएनए नमुना परीक्षण तथा विश्लेषणका लागि नेपाली अधिकारीहरूसँग मिलेर कार्य गरिरहेको छ।
नेपाल सरकार र नेपाली जनतालाई यस विषम परिस्थितिमा सम्भाव्य सबै सहयोग उपलब्ध गराउन भारत प्रतिबद्ध रहेको र उद्धार तथा पुनर्लाभका प्रयास जारी रहने जनाइएको छ।
