अन्तर्राष्ट्रिय स्तरमा भएको लामो अनुसन्धान र कानुनी प्रक्रियापछि नेपालमा नाबालिगहरूमाथि यौन दुर्व्यवहार गर्ने एक अमेरिकी नागरिकले अमेरिकी अदालतसमक्ष आफ्नो अपराध स्वीकार गरेका छन्।
इलिनोइस राज्यको दक्षिण जिल्लास्थित अमेरिकी जिल्ला अदालतमा ५८ वर्षीय केनेथ जोसेफ कुम्ब्सले आफूमाथि लगाइएको वैदेशिक भूभागमा गैरकानुनी यौन व्यवहारको अभियोग स्वीकार गरेका हुन्।
सङ्घीय अभियोजनकर्ताहरूका अनुसार कुम्ब्सले सन् २०१६ को अगस्टमा नेपाल भ्रमण गरेका थिए। सोही क्रममा उहाँले भदौ मध्यसम्मको अवधिमा बल प्रयोग, लठ्ठ्याउने पदार्थको प्रयोग र रकमको प्रलोभन देखाएर नाबालिगहरूमाथि यौन शोषण गर्नुका साथै आपत्तिजनक तस्बिरहरू खिचेका थिए।
यसअघि पनि मिजुरी राज्यमा यौन अपराधको कसुरमा दोषी ठहर भई लगत दर्ता सूचीमा रहेका कुम्ब्सले नेपालमा आठ जना फरक-फरक नाबालिगमाथि कसुर गरेको अभियोगमा आठ वटा छुट्टाछुट्टै मुद्दा झेल्दै आएका थिए। तर, हालै भएको सम्झौता अनुसार उहाँले एउटा अभियोग स्वीकार गरेपछि बाँकी मुद्दाहरू खारेज हुने भएका छन्।
नेपालमा करिब नौ वर्ष जेल जीवन बिताइसकेका कुम्ब्सलाई सेप्टेम्बर २०२५ मा अमेरिका फर्किएलगत्तै प्रहरीले नियन्त्रणमा लिएको थियो। उहाँ त्यसयता लगातार हिरासतमा रहँदै आएका थिए।
नेपालमा बिताएको जेल समयलाई समेत ध्यानमा राखेर सरकारी वकिल र बचाउ पक्षका वकिलहरूले उहाँलाई ११ देखि २५ वर्षसम्मको कैद सजाइका साथै जीवनभर निगरानीमा राख्ने सहमति जनाएका छन्। अदालतले आगामी दिनमा उहाँमाथि अन्तिम सजायको घोषणा गर्नेछ।
