त्रिपुरेश्वरस्थित दशरथ रंगशालामा सञ्चालन भइरहेको राष्ट्रिय रग्बी सेभेन्स प्रतियोगिताले महिला रग्बीमा नयाँ रोमाञ्चकता थपेको छ। समूह 'ए' को कडा प्रतिस्पर्धामा उत्कृष्ट आक्रामक खेल प्रदर्शन गर्दै वागमती प्रदेश र कर्णाली प्रदेशले सेमिफाइनलको यात्रा तय गरेका छन्।
यी दुई प्रदेश बीचको खेल १०-१० को रोमाञ्चक बराबरीमा टुंगिएको थियो, जसले दुवैलाई समान सात अंक दिलायो। यद्यपि, विपक्षीविरुद्धको समग्र प्रदर्शनमा वागमतीले बाजी मार्यो। प्रतियोगिताभर वागमतीले विपक्षी पोस्टमा ६५ स्कोर गर्दा कर्णालीले ५९ स्कोर मात्र गर्न सक्यो, जसको प्रत्यक्ष फाइदा उठाउँदै वागमती समूह विजेता बन्न सफल भयो। समूह चरणमा वागमतीले मधेसलाई ३५-० र लुम्बिनीलाई २०-० ले स्तब्ध पार्यो भने कर्णालीले लुम्बिनीलाई २४-० र मधेसलाई २५-० ले पराजित गर्यो।
यसैगरी, समूह 'बी' मा त्रिभुवन आर्मी क्लबले आफ्नो दबदबा कायम राखेको छ। विभागीय टोली आर्मीले सशस्त्र प्रहरी बल (एपिएफ) लाई १४-५ र सुदूरपश्चिम प्रदेशलाई ४४-० को फराकिलो अन्तरले हराउँदै समूह विजेताको रुपमा अन्तिम चारमा स्थान पक्का गर्यो। यस समूहबाट सेमिफाइनल पुग्ने अर्को टोलीको टुंगो एपिएफ र सुदूरपश्चिम बीचको खेलले लगाउनेछ।
नेपाल रग्बी संघको आयोजना तथा राखेपका सदस्यसचिव रामचरित मेहताको उद्घाटनबाट सुरु भएको यस प्रतियोगिताको पुरुषतर्फ पनि सेमिफाइनल समीकरण पूरा भइसकेको छ। समूह 'ए' बाट आर्मी र गण्डकी तथा समूह 'बी' बाट एपिएफ र कोशी अन्तिम चारमा पुगेका छन्।
करिब ३० लाख रुपैयाँको लागतमा सञ्चालित यस प्रतियोगिताले खेलाडीको सुरक्षालाई विशेष प्राथमिकतामा राखेको छ। आयोजकका अनुसार प्रत्येक सहभागी खेलाडीको १ लाख २५ हजार रुपैयाँ बराबरको खेल दुर्घटना बिमा गरिएको छ भने भक्तपुर इन्टरनेसनल अस्पतालले स्वास्थ्य सेवा प्रदान गरिरहेको छ।
उपाधि चुम्ने टोलीले ५० हजार रुपैयाँ र उपविजेताले ३० हजार रुपैयाँ प्राप्त गर्नेछन्। उत्कृष्ट महिला र पुरुष खेलाडीले जनही ५ हजार रुपैयाँ पाउनेछन्। अब सुरु हुने नकआउट चरणका खेलहरूले उपाधिको दाबेदार को हुनेछ भन्ने अन्तिम फैसला गर्नेछ, जसका लागि टोलीहरूले आफ्नो सम्पूर्ण शक्ति लगाउने निश्चित छ।
