सर्वोच्च अदालतले नेकपा बहुमतका महासचिव धर्मेन्द्रराज बास्तोलाको तत्काल रिहाइ गर्न अस्वीकार गर्दै सरकारलाई पक्राउको कानुनी कारण पेश गर्न आदेश दिएको छ।
न्यायाधीश हरिप्रसाद फुयाँलको एकल इजलासले सोमबार बन्दीप्रत्यक्षीकरण रिटमाथि सुनुवाइ गर्दै राज्य पक्षसँग बास्तोलालाई पक्राउ गर्नुको आधार स्पष्ट पार्न निर्देशन दिएको हो। अदालतले यस चरणमा रिहाइ आदेश भने जारी गरेन।
आसन्न प्रतिनिधिसभा निर्वाचन बहिष्कारको नीति प्रचार गरेको आरोपमा प्रहरीले बास्तोलालाई पक्राउ गरेको थियो। त्यसपछि शावित्री कुमारी वलीले उहाँका तर्फबाट बन्दीप्रत्यक्षीकरण रिट दर्ता गराएकी हुन्।
रिटमा काठमाण्डौ उपत्यका अपराध अनुसन्धान कार्यालय टेकु, जिल्ला प्रहरी परिसर काठमाण्डौ, जिल्ला प्रशासन कार्यालय काठमाण्डौ तथा सम्बन्धित प्रमुखहरूलाई विपक्षी बनाइएको छ।
अदालतको आदेशसँगै अब बास्तोलाको पक्राउ प्रक्रिया र कानुनी आधारबारे सरकारको जवाफ न्यायिक परीक्षणको विषय बन्नेछ।