करातेकी स्टार खेलाडी एरिका गुरुङ र ओलम्पियन टेबल टेनिस खेलाडी स्यान्टु श्रेष्ठले २०औं एनएनआइपिए स्पोर्टस अवार्ड २०८१ मा सर्वोत्कृष्ट खेलाडीको उपाधि जितेका छन्। काभ्रेपलाञ्चोकको बनेपास्थित चन्डेश्वरी मन्दिर परिसरमा शुक्रबार आयोजित विशेष समारोहमा २६ खेलका उत्कृष्ट खेलाडीहरूमध्येबाट उनीहरूलाई सर्वोत्कृष्ट घोषणा गरिएको हो। नेपाल राष्ट्रिय तथा अन्तर्राष्ट्रिय खेलाडी संघ (एनएनआइपिए) द्वारा आयोजित यो कार्यक्रम पहिलो पटक उपत्यका बाहिर आयोजना गरिएको हो।
स्यान्टु श्रेष्ठले दक्षिण एसियाली छनोट चरण पार गर्दै पेरिस ओलम्पिकमा स्थान सुरक्षित गरेर नेपाली टेबल टेनिसमा इतिहास रचेका थिए। यस्तै, करातेकी एरिका गुरुङले मोरक्कोमा भएको प्रिमियर लिगमा ऐतिहासिक काँस्य र अष्ट्रेलियन ओपनमा स्वर्ण पदक जितेकी थिइन्। एरिकाका लागि यो लगातार दोस्रो वर्षको सर्वोत्कृष्ट अवार्ड हो। सम्मानपछि उनले लगातारको यो सफलताले आफूलाई थप उत्साहित र प्रेरित बनाएको प्रतिक्रिया दिइन्।
प्रतिभावान् खेलाडीतर्फ पुरुषमा तेक्वान्दोका अभिषेक बराल र महिलामा बक्सिङकी स्वस्तिका तिरुवा सम्मानित भए। अभिषेकले एसियन तेक्वान्दो च्याम्पियनसिपमा रजत र स्वस्तिकाले समर गेम्समा स्वर्ण जितेकी थिइन्। त्यसैगरी, प्यारा खेलाडी सम्मानबाट एथलेटिक्सकी प्रभा आङदाम्बेलाई पुरस्कृत गरियो।
खेलकुद क्षेत्रमा अतुलनीय योगदान पुर्याउने व्यक्तित्वहरूलाई पनि समारोहमा विशेष सम्मान गरियो। महिला भलिबल प्रशिक्षक कुमार राईलाई ‘गजराज जोशी आदर्श खेल व्यक्तित्व’ र दुई दशकदेखि सक्रिय फोटो पत्रकार उदिप्त सिंह क्षेत्रीलाई ‘एनएनआइपिए पत्रकारिता पुरस्कार’ प्रदान गरियो। दुवैले जनही ३५ हजार रुपैयाँ प्राप्त गरे।
समारोहमा विभिन्न २६ खेल विधाका वर्ष उत्कृष्ट खेलाडीहरूलाई पनि ट्रफी र सम्मान प्रदान गरिएको थियो। राष्ट्रिय खेलकुद परिषद्का सदस्य सचिव र बनेपा नगरपालिकाका मेयर लगायतका पदाधिकारीहरूले खेलाडीहरूलाई सम्मानित गरेका थिए। यस अवार्डले नेपाली खेलाडीहरूको मनोबल उच्च राख्न र मोफसलमा खेलकुदको माहोल बनाउन महत्त्वपूर्ण भूमिका खेल्ने देखिएको छ।
