सप्तरीको राजविराजस्थित गजेन्द्रनारायण सिंह सगरमाथा अस्पतालको परिसरबाहिरै एक गर्भवती महिलाले शिशुलाई जन्म दिनुपरेको दुःखद घटनापछि स्वास्थ्य तथा जनसङ्ख्या मन्त्रालयले कडा कदम चालेको छ। आकस्मिक स्वास्थ्य सेवाबाट नागरिक वञ्चित हुनुपरेको यस विषयमा मन्त्रालयले अस्पताल प्रशासनसँग २४ घण्टाभित्र चित्तबुझ्दो स्पष्टीकरण माग गरेको छ।
घटनाको यथार्थ विवरण सङ्कलन गर्नका निम्ति मन्त्रालयले पाँच सदस्यीय छानबिन टोलीलाई आजै राजविराज पठाएको छ। उक्त टोलीमा नेपाल मेडिकल काउन्सिलका रजिस्ट्रार डा. सुप्रभात श्रेष्ठ, एथिकल कमिटीका सदस्य डा. अजय शाह तथा मन्त्रालयको उपचारात्मक सेवा महाशाखा प्रमुख डा. पवनजंग रायमाझी हुनुहुन्छ।
मन्त्रालयको बढ्दो सक्रियतापश्चात् अस्पताल प्रशासनले पनि घटनाबारे अनुसन्धान गर्न आफ्नै तहमा छुट्टै छानबिन समिति बनाउने प्रक्रिया थालेको छ।
स्वास्थ्य संस्थामा आएका कुनै पनि बिरामीलाई उपचार नदिई फर्काउनु वा बेवास्ता गर्नु कानुनविपरीत हुने भन्दै मन्त्रालयले छानबिनमा दोषी ठहरिने जोकसैलाई पनि विद्यमान कानुनबमोजिम कडा कारबाही गरिने प्रतिबद्धता जनाएको छ।
