नाइट आउल जीवनशैलीले हृदयघात र स्ट्रोकको जोखिम बढाउन सक्छ: अध्ययन

ढिलो सुत्ने र राति बढी सक्रिय रहने जीवनशैलीले मुटुको स्वास्थ्यमा दीर्घकालीन असर पार्न सक्ने नयाँ अध्ययनले देखाएको छ।

अमेरिकन हार्ट एसोसिएसनको जर्नलमा प्रकाशित अध्ययनअनुसार “इभिनिङ टाइप” अर्थात् नाइट आउल व्यक्तिहरूमा हृदयघात र स्ट्रोकको जोखिम औसतभन्दा १६ प्रतिशत बढी देखिएको छ। बेलायतका ३ लाख २० हजारभन्दा बढी वयस्कको स्वास्थ्य तथ्यांक विश्लेषण गरेर निष्कर्ष निकालिएको हो।

अध्ययनमा अमेरिकन हार्ट एसोसिएसनको Life’s Essential 8 मापदण्ड प्रयोग गरिएको थियो, जसमा आहार, शारीरिक सक्रियता, निद्राको अवधि, धूम्रपानजस्ता बानी र रक्तचाप, सुगर, बोसो तथा तौलजस्ता स्वास्थ्य सूचक समावेश छन्।

नाइट आउल व्यक्तिहरूमा समग्र मुटु स्वास्थ्य कमजोर हुने सम्भावना ७९ प्रतिशत बढी पाइएको छ। तर अनुसन्धानकर्ताहरूका अनुसार जोखिमको मुख्य कारण ढिलो सुत्नु मात्र होइन, त्यससँग जोडिएका बानीहरू हुन्।

धूम्रपानले जोखिमको सबैभन्दा ठूलो हिस्सा ओगटेको देखिएको छ भने कम निद्रा, उच्च रक्तचिनी, तौल र आहारले पनि जोखिम बढाएको छ। महिलामा यस प्रकारको जीवनशैलीको असर झन् बढी देखिएको अध्ययनले जनाएको छ।

विशेषज्ञहरूका अनुसार नाइट आउलहरू बिहानमुखी सामाजिक तालिकामा जबर्जस्ती मिल्नुपर्दा स्वास्थ्यमा नकारात्मक प्रभाव देखिन सक्छ। त्यसैले सानो-सानो व्यवहार परिवर्तन, नियमित सुत्ने समय र धूम्रपान त्यागजस्ता उपाय प्रभावकारी हुनसक्ने निष्कर्ष निकालिएको छ।