सामाजिक सञ्जाल र राजनीतिक वृत्तमा यतिबेला राष्ट्रिय स्वतन्त्र पार्टीका सांसद पुरुषोत्तम यादवको जीवनशैली र आर्थिक प्रगतिलाई लिएर गम्भीर प्रश्नहरू उठ्न थालेका छन्। ‘साइलेन्स ब्रेकर’ नामक फेसबुक प्रयोगकर्ताले आसन्न निर्वाचनको टिकट वितरणसँग जोडेर लामो स्टाटस लेखेपछि यादवमाथि लागेका विभिन्न आरोपहरू चियापसलदेखि चोक–चौतारोसम्म चर्चाको विषय बनेका छन्।
सामान्य पारिवारिक पृष्ठभूमि र सांसदको तलब
सांसद पुरुषोत्तम यादवको पारिवारिक आर्थिक अवस्था विगतमा निकै कमजोर रहेको बताइन्छ। उनका बुबाले सामान्य किराना पसल चलाएर परिवारको गुजारा गर्दै आएका थिए। तर, सांसद बनेपछिको छोटो अवधिमै यादवको जीवनशैलीमा आएको विलासी परिवर्तनले आम मानिसलाई चकित पारेको छ। नेपालमा एक सांसदले पाउने सीमित तलब र सेवासुविधाको भरमा मात्र यति छोटो अवधिमा करोडौँको सम्पत्ति जोड्न असम्भव प्रायः मानिन्छ। यसैकारण सर्वसाधारणले उनको यो अस्वाभाविक आर्थिक प्रगतिमाथि प्रश्न उठाउँदै विभिन्न अनुमान लगाउन थालेका छन्।
रवि लामिछानेसँगको निकटता र टिकट बिक्रीको चर्चा
सांसद यादवलाई पार्टी सभापति रवि लामिछानेका अत्यन्त निकट र विश्वासपात्र मानिन्छ। आगामी स्थानीय तथा प्रदेश निर्वाचनका लागि उम्मेदवार छनोटको अध्ययन गर्न सभापति लामिछानेले आफ्ना सांसदहरूलाई अन्तर्जिल्लाको जिम्मेवारी दिएर पठाएका छन्। मधेसमा राम्रो प्रभाव राख्ने यादवमाथि यही जिम्मेवारीको फाइदा उठाउँदै टिकट बेच्न लागेको आरोप छ। सामाजिक सञ्जालमा दाबी गरिएअनुसार, टिकट मिलाइदिने वाचासहित एक बिचौलियामार्फत उनले कुनै राजस्थानी–नेपाली व्यापारीसँग ८० लाख रुपैयाँ बुझेको हल्ला बजारमा फैलिएको छ।
काठमाडौँमा घर, फ्ल्याट र करोडौँका गाडी
सर्वसाधारणको चियागफ र बजारका हल्लाहरूलाई मान्ने हो भने, सुशीला कार्कीको सरकार गठन भएपछि यादवले असुली धन्दा चलाएको आरोप छ। सोही रकमबाट उनले काठमाडौंको नयाँ बानेश्वरस्थित आलोकनगरमा अढाई तले घर र सिनामंगलमा अपार्टमेन्ट किनेको चर्चा छ।
यति मात्र होइन, उनले खरिद गरेका करोडौँका गाडीहरूको विषयले झनै राजनीतिक बजार तताएको छ। स्रोत लुकाउन उनले छुट्टाछुट्टै व्यक्तिका नाममा गाडी खरिद गरेको आरोप छ। चर्चामा आएअनुसार, उनले आमा आशा देवीको नाममा 'एमजी' गाडी, नविल कारकको नाममा 'इसुजु डिम्याक्स' (जुन केदारनाथ शर्माको सालोबाट खरिद गरिएको बताइन्छ), साथी अंकित यादवको नाममा 'रिडारा पिकअप इलेक्ट्रिक' र अन्य कुनै व्यक्तिको नाममा 'बीवाइडी' गाडी खरिद गरेका छन्। आफू र परिवारको नाममा मात्र नभई नदेखिने गरी अन्यत्र पनि ठूलो धनसम्पत्ति लुकाएको अनुमान गरिएको छ।
जेन्जी नेताहरूबीचको आर्थिक असमानता र जनगुनासो
नेपाली राजनीतिमा पछिल्लो समय उदाएको जेन्जी पुस्ताबाट जनताले ठूलो आशा राखेका थिए। तर, यही पुस्ताका नेताहरूबीच देखिएको चरम आर्थिक असमानताले धेरैलाई विडम्बनापूर्ण अवस्थामा पुर्याएको छ। एकातिर राजनीतिमा लागेका केही इमानदार युवा नेताहरूसँग पठाओ, इनड्राइभ र याङ्गो जस्ता राइड सेयरिङ एपमा यात्रा गर्ने सामान्य भाडासमेत हुँदैन, अर्कोतिर यादवजस्ता केही नेताहरू भने छोटो समयमै करोडपतिको सूचीमा उक्लिएको भन्दै आलोचना भइरहेको छ। यद्यपि, सांसद यादवलाई कानुनले दोषी ठहर गरिसकेको छैन। यी सबै विषयहरू अहिले बजारका हल्ला र सर्वसाधारणका अनुमान मात्र हुन्, तर छोटो समयमै देखिएको यो विलासी जीवनशैलीले नयाँ पुस्ताको राजनीति र उनीहरूको नियतमाथि भने गम्भीर प्रश्न खडा गरिदिएको छ।
